Dans chu monde, nou n’peut dgéthe dithe qu’autcheune chose est cèrtaine, sénon la mort et les taxes. Chu diton vînt, à chein tch’i’ pathaît, d’la plieunme d’l’Améthitchain, Benjamin Franklin.

La situâtion êcononmique d’achteu a êtibotchi du hèrtchîn ichîn entouor la TBS. Les beins et les sèrvices sont taxés à un bas nivé, par rapport à la TVA siez nos grands vaîthîns – et dans san drein budget, lé Chancélyi au Rouoyaume Unni annonchit la haûchithie d’la TVA siez ieux jusqu’à vîngt du chent.

L’avis du Député Higgins, tch’est pouor ouapper les boutiques dé Jèrri tchi chèrgent l’êtchivalent d’la TVA du RU, sembl’ye rêpondre ès pliaintes dé hardi d’monde – mais y’en a tch’ont crititchi l’idée qu’Les Êtats dévthaient lus mêler dans les prix du marchi. Tout coumme, si la TVA s’sa haûchie au RU, v’là tchi f’tha du bein sans doute pouor les conmèrces dé Jèrri tchi sont d’biteurs en lîngne et compangnies d’env’yêthie, coumme par exempl’ye Play.com et IndigoStarfish.

Mais y’en a tchi critiquent tréjous la compétition d’taxe entre des pays, et ch’est à vaie si la politique d’achteu sus les compangnies d’siez nous et d’hors l’Île restétha coumme oulle est. Lé gângnant d’la dreine êlection, l’Sénateu L’Gresley ’tait pouor haûchi la taxe sus l’èrvénu des pus riches. Jean-Baptiste Colbert, tchi ’tait l’minnistre des finnances souos l’Rouai Louis XIV, compathit la taxâtion d’auve la plieunm’thie d’un pithot: i’ faut haler l’pus d’plieunmes auve lé mains d’criethie.

Si ch’est l’èrvénu ou les beins et les sèrvices, la sociêté d’achteu n’peut pon exister sans taxes. I’ faut taxer où’est qu’i’ sont les sou. Nou d’mandit eune fais à un voleux d’banques, blioutchi acouo eune fais pouor un vol mantchi, pouortchi qu’i’ tâchait tréjous d’voler des banques. I’ rêponnit qué né v’là qu’i’ ’taient les sou. I’ n’vaut pon la peine dé taxer où’est qu’i’ y’a autant d’sou coumme un crapaud a d’puches. Par lé nivé d’taxe nou-s’attrioque ou cache du dêm’nîn, et des milsoutchièrs étout. Même pouor un milsoutchi, rein n’est cèrtain, sénon la mort et les taxes. Ch’est en tchi nou-s’est pus seux s’nou peut chouaîsi par ioù mouothi et par ioù payi les taxes.
Geraint Jennings

Death and taxes
Nothing is certain in life, except death and taxes. Recent discussion about the level of GST and the news from the UK about a rise in VAT has focused attention on taxes. Should shops in Jersey that charge an equivalent of UK VAT be penalised?

Should the States regulate prices? UK government action on VAT may inadvertently boost Jersey fulfilment traders, although tax competition is not uncontroversial. Politicians differ also. Senator Le Gresley has proposed a higher income tax rate on top earners, while the advice of Louis XIV’s finance minister was that the art of taxation was like plucking a goose: extract the maximum of feathers with the minimum of hiss. Modern society needs taxes, but you can’t tax if the targets aren’t there. The rich can’t avoid death or taxes, but at least they try to arrange where these things happen to them.

Useful vocabulary: êtibotchi: stir up; hèrtchîn: argy-bargy; nivé: level; haûchi: raise; pliainte: complaint; crititchi: criticise; marchi: market; d’biteux: retailer; env’yêthie: dispatch; èrvénu: income; mantchi: fail; blioutchi: arrest; attriotchi: attract; cachi: drive (away); milsoutchi: moneybags; mouothi: die.